 |
| Ghurbat ki wujuhat (Causes of poverty), Pakistani mindset Financial mistakes in Urdu, Success tips in Roman Urdu, Middle class problems Pakistan, |
Ghurbaat Ki 15 Hairan-kun Wujuhat: Hum Ghareeb Kyun Hain?
Ghurbaat Ki Hairan-kun 15 Wujuhat...
1. "Sarkari Naukri" Ka Nasha:
Pakistani jawan ki jawani ke behtareen 10 saal "Sarkari Naukri" ke intezar mein gal sarr jate hain... Wo 25 hazar ki private naukri ya chota karobar karne ko toheen samajhte hain aur 30 saal ki umar tak walidain ke tukron par palte hain... Jab hosh aata hai tab tak waqt aur umar dono hath se nikal chuke hote hain.
2. Dikhawe Ki Shadiyan:
Jeeb mein phooti kauri nahi, magar shadi par 10 lakh ka khana aur 5 lakh ka jahez dena "Naak" ka masla hai. Ye qaum apni zindagi ki kul jama-punji sirf 4 ghante ki taqreeb mein logon ko khana khila kar barbaad kar deti hai, aur phir agle 5 saal qarza utarti rehti hai.
3. Degree Zada Jahil:
Hath mein Masters ki degree hai, magar ek professional email likhni nahi aati... Hamare taleemi nizam ne sirf "Naukar" paida kiye hain, hunar-mand nahi. Degree ko qabilayat samajhna sab se bari bewuqufi hai, kyunke market degree ko nahi, Skill ko paise deti hai.
4. Ek Kamaye, Das Khayain:
Mushtarka khandani nizam (Joint Family) ki ye karwi sachai hai ke agar ek bhai kamane lag jaye to baqi sab "pair pasar" kar lait jate hain... Yahan "Parasite" (muft-khore) banne ka rawaj hai... Jis ki wajah se kamane wala bhi kabhi ameer nahi ho pata, kyunke us ka paisa sarmaya-kari mein nahi, dusron ka pait bharne mein lag jata hai.
5. Committee Culture:
Pakistanion ko investment se dar lagta hai magar "Committee" dalne ka shauq hai. Committee (Dead Money) hai. 2 saal baad jo ek lakh milega, mehangai ki wajah se uski qadar 60 hazar reh chuki hogi. Ye bachat nahi, apne paise ki qadar girane ka tariqa hai.
6. Ana Ka Butt:
"Mein Chaudhry ka beta hoon, mein rehrri lagaun ga?" Is jhooti ana ne lakhon ghar ujaarr diye. Yahan log bhooke mar jayenge lekin koi chota kaam shuru karne mein sharam mehsoos karenge. Yaad rakhein, kaam chota nahi hota, bande ki soch chhoti hoti hai.
7. Sehat ki tabahi:
Hum wo qoum hain jo 40 saal ki umar tak tail (oil) aur cheeni thons kar apna jism barbad karte hain aur phir 50 saal ki umar ke baad apni sari kamayi hospitals mein doctoron ko de dete hain. Sehat ko nazar-andaz karna ghurat ka seedha rasta hai.
8. Shortcut ki talash:
Hamein ameer banna hai, lekin mehnat ke baghair. Kabhi Double Shah, kabhi Crypto ke fraud aur kabhi lottery... Pakistani qoum process par yaqeen nahi rakhti, isay maujza (miracle) chahiye... aur maujze ke intezar mein naslein ghareeb reh jati hain.
9. Ilzam tarashi:
"Hukumat kharab hai, Nawaz Sharif kha gaya, Imran Khan ne kya kar liya, Fauj nahi chorti..."
Ye wo chooran hai jo nakam log roz bechte hain. Ye maanne ke bajaye ke "main nalayaq hun", wo apni nakami ka malba system par daal kar bari-uz-zimma ho jate hain.
10. Udhaar par ayashi:
Hum wo log hain jo "iPhone" qiston (installments) par lete hain, taake un logon ko mutasir kar sakein jo hamein pasand bhi nahi karte. Ghair-zaroori cheezon (Liabilities) ke liye qarz lena mali khudkushi hai, jo yahan ka har doosra banda kar raha hai.
11. Seekhna band:
Degree milte hi kitab band... Pakistani ausatan (average) saal mein aik kitab bhi nahi parhta... Jab aap apne dimagh par invest karna band kar dete hain, to aap ki jeeb khud-ba-khud khali hona shuru ho jati hai.
12. Aulaad bator insurance policy:
Ghurbat ki ek bari wajah "be-tahasha bache" hain. Ghareeb aadmi bache is liye paida karta hai ke "ye bare ho kar kamayein ge". Wo ye nahi sochta ke wasail (resources) ke baghair palne wale bache "sarmaya" nahi, muashre aur waldein par "bojh" bante hain.
13. Risk phobia:
"Paisa doob na jaye". Is darr se log paisa bank mein sarne dete hain ya plot le kar chor dete hain. Karobar karne ka, risk lene ka hosla hi nahi hai, aur jo risk nahi leta, wo kabhi taraqqi nahi karta.
14. Hasidana rawayya:
Ameer aadmi ko dekh kar ye seekhne ke bajaye ke "ye kaise ameer hua?", hum kehte hain "zaroor haraam kamaya hoga." Ameeron se nafrat kar ke aap kabhi ameer nahi ban sakte, kyunke la-shaoori (subconsciously) tor par aap wo banna hi nahi chahte jise aap bura samajhte hain.
15. Waqt ka qatl-e-aam:
Chaye ke dhabon par ghanton siyasat par behas, TikTok par scrolling aur fazool mehfilein. Ghareeb aadmi ke paas paise ke ilawa sab se qeemti cheez "waqt" hoti hai, aur wo isi ko sab se zyada be-dardi se zaya karta hai.
Apni bad-haali ka malba hukumat ya taqdeer par dalna band karein, kyunke haqiqat ye hai ke aap ki jeeb khali nahi balkay aap ka dimagh banjar hai... Jab tak aap apni "jhooti ana" aur "susti" ka janaza nahi nikalein ge, ghurbat aap ki naslon ko isi tarah chaat-ti rahe gi.
#PovertyMindset
#RealityCheck
#ChangeYourThinking
#FinancialAwareness
#BreakTheCycle
#StopWastingTime
#SkillOverDegree
#HardTruths
#SelfAccountability
#MindsetMatters
#PersonalGrowth
#FinancialLiteracy
#LearnAndGrow
#NoMoreExcuses